情人節

今日路經花店, 見到成堆花束放曬係行人路, 先醒起原來今日係"情人節" . 係我屋企, 完全都唔會去記依d日子, 一年到晚咁多既節日, 我地都唔會跟足去揍熱鬧. 

越來越覺得依d所謂既節日, 都係商家諗出來. 情人節收花果個當然好開心, 不過最開心既我相信定係"花店老闆", 餐廳老板等等相關人士, 真係賺到笑啊~~

我地既睇法既: 有心既話幾時都可以慶祝, 唔仲意跟大團一齊去做, 因為係"羊群效應"之下, d野係會搶貴曬, 大家係要付出"溢價".

需要 vs 想要

記得中學讀經濟, 第一次係老師口中聽到"需要" (need) 同 "想要" (desire)既分別. 咩野係"需要"呢?? 就係維持我地生命要既野, 例如: 空氣, 水, 食物 等. "想要" 既野就多好多, 想要既野係無窮盡既(desire is infinity).

不過今時今日, 我地消費好多時都基於"想要"多過"需要". 明明衣櫃已經有好多衫, 都仲想買, 一個人有幾十對鞋(普通上班族), 化妝品一出新野又去買, 唇膏都有幾十支等. 唔係小數, 身邊真係好多人都係咁. 

"慾望無盡, 人工有限", 試過有人真係因為買野而攪到要債台高築, 最後破產.切記切記.

免費"福面"

天氣咁凍(9度), 好想食d熱野, 頭先忍唔住煮個即食面食, 成身暖曬~

拎起包"福面", 突然醒起係免費派發既物品, 我一共拎左3包. 因為前幾日去買餸既果條街, 前前後後有3個人係處派,佢派比我就拎.一包面計起來都2蚊, 慳左6蚊.

其實香港條街到真係好多免費野派, 係我公司樓下就成日都有新產品派試飲試食裝. 人地派我一定會去支持佢地嫁. 我試過拎到雞湯(大盒), 豆奶, 鮮奶, 即飲咖啡, 提神飲品, 公仔點心, 餅乾, 女性衛生用品, 洗頭水, 沐浴露.....用得著既我會排隊/向唔同既人拎多幾份, 我覺得同派錢無咩分別羅, 我慳左既就係"錢".

或者有人會覺得好小氣咁, 轉個角度諗, 派野既人想早收工, 老闆就想人試食試飲試用, 我就想慳錢, 各得所需.

豐衣足食

香港人既生活真係可以話"豐衣足食". 話豬肉, 雞, 菜貴左幾多幾多, 過年既食品一樣照舊咩都唔少得.

奶奶過年照舊比左我一隻雞, 2斤燒肉, 2隻大烏頭魚, 十二個橙, 半底蘿白糕, 一夠年糕, 一底馬蹄糕.  問題係我地一家初一至初三基本上都係佢屋企開飯. d野點食得曬. 仲有日日大魚大肉, 真係食到嘴都歪埋.

雖然天氣凍, 但d野放得耐都無益, 唔想side野, 我想到既方法就係今日拆左隻雞晏晝煲雞粥, 一家食左好舒服. 燒肉就加大介菜一齊炆, 連埋一條烏頭魚今晚食. 日日以糕做早餐.

我同老公都唔贊成奶奶買咁多野, 不過老人家習慣左, 覺得咁樣先叫做"過年"(其實就係浪費), 講極都唔聽, 唯有年年自己想辦法啦. 

開倉

最近一個星期係咁買野買唔停, 因為去左"開倉"啊~~

好多貨倉/洋行會係新年前清貨尾/貨版, 依d貨真係比平時係鋪頭買既平好多, 好似去鞋倉買鞋比小朋友, $200/4對, 平時同樣貨品係百貨公司賣成$15x對. 衫褲仲平, 名牌果d都係$40件, 無咁出名既就$20件. 大人外套大褸, 百零蚊就有. 出口名牌羊衫都係$120件.

依d倉好多係觀塘, 葵涌, 荔枝角. 大家留意下就會發現.

不過買還買, 我都會以"需要"為大前提, 去開倉之前寫定個shopping list比自己, 因為咁既環境好容易失控, 買到停唔到手~~