工展會收獲(一)

昨日行左2個鐘工展會既收獲(出血 $470):

1. 添寶肉鬆蛋卷 禮盒裝 3盒 $105 送二小盒(價值 $25) (禮盒裝 用來送禮, 贈品就比囝囝食). 依樣我年年都買來送比親友, 大家都歡喜.

2. 添寶牌即食麥皮 3包 (700克) $40

3. (1B07-08, 15-16) 官燕棧湯包套裝 $130(6包/套), 賣湯包有好多檔, 檔檔其實都差唔多, 不過要打開睇真d, 因為有d唔係湯包, 而係食材例如木耳等.
4. 淘大瑞士汁 2支, 蒸魚醬油 2支 $40 (加埋比起超市價錢就只係平DD, 不過屋企岩岩用曬, 順手買埋)
5. 花菇 半斤 $40
6. (5A51) 大人口罩 30個 $15

7. 日本魔芊 2包 $23 (平時 $14.90-$15.5一包, 買比囝囝做小食)
8. 天麻洗頭水 200ml $20 + $1 送 400ml兒童沐浴露/洗頭水 (依支沐浴露屈記賣二十幾蚊)

9. 陳記點心 4包 (日式燒賣, x燒包, 芊蓉包, 饅頭) $30 , 即送$10 coupon 比你即場買點心食. 如果你好似我咁樣, 諗住都會食燒賣充飢, 就不妨買埋佢. $20 4包 真係超價.

10. 花膠碗仔翅 $15 (無上年咁好食, 料少左, 食唔過)
11.( 5C36-37) $1 彩豐行沐浴露 50ml. 現場d推廣姐姐見人就派sample, d sample都有 15ml.

12.$2支 雙妹嘜花露水(有d比佢搵笨既感覺, 因為花露水得好少, 係個樽仔都幾好. 可以循環再用來裝火酒出街噴手, 或者裝花露水當蚊怕水用都得.) 買左依支sample, 加$30可以買一支200ml既花露水,應該都有平既. 另外檔口仲有 $100套裝出售. 如果用開佢地既產品既, 都不妨去睇睇.

其他:

1. 返到屋企先至知道, 原來參展商蛋撻王首星期每日首 100名購買客人，買一個贈送一打裝普通蛋撻禮券。唔怪之得一入場就見到條十幾二十人既人龍啦~走寶添.

2. 又係睇報紙先知, d人排1個半鐘先買到$1 樽位元堂藥廠冰糖燕窩. 排咁耐, 完全唔值得. 

3. 係現場發現有d檔口所謂既"震撼性優惠"係有先決條件既.好似:

- 冠華食品 (2A13-15) $1 包齋雞粒, 要買滿$20先至可以換購既

- DR 醫學美容護膚品研製中心(4C45-53) $1, $5 貨品, 又係要換購既. 仲有好多sales拉住你係咁sales, 不去也吧!

4. 如果你一早(11點入場), 應該去行左"食品飲料區"先. 因為果處條通道又細又多人行, 時間早就可以慢慢睇真先買, 一到十二點就多人多到你逼唔到埋去買添. 行完先再去其他區仲好鬆動, 一d都唔逼.

5. 工展會買野係可以講價既. 我見到個阿婆想買花膠, 同檔主講平左$20. 我買果支洗頭水, 本來話要買2支先可以可+$1換購, 我話唔買要走, 佢即刻拉住又話得. 見係我咋......買左野問佢要多小小贈品又得. 不過我估大公司大牌子就未必得. 因為佢地要入數.

6. 熟食檔有$20 2隻"燒帶子". 用既其實係"急凍熟元貝". 我買開果間批發價$64-$72 1kg, 有30隻左右. 真係賺死佢. 

現場亦有1kg裝比你買返屋企, 售價$138. 都貴一倍. 真係識做生意. 

7. 比起舊年, 好多檔口今年都陰陰地加左價. 大家真係要列左清單格左價先至好入場. 

8. 提醒大家, 一定要帶車仔, 因為場入食物用品多數係以"套裝"出售, 你會越買越多, 越拎越重.

報告先到此為止. 有時間再去過, 因為仲有台式一口香腸未買. 當然大家有好料都要報比我知啊~~

笑話一則:

我自備依架"戰車"去工展會, 行行下就突然有人行埋來問我架車係邊個檔口買既, 架車好靚......等等. 我要解釋完一次又一次: "架車唔係工展會買既". 真係幾攪笑.