深層手足修護(夜)霜

天氣話轉就轉, 今日突然凍左好多. 聽講"今年冬天會很冷"添!

天氣一轉, 師奶之間傾既話題年年都係"搽咩好", 因為家中都有小朋友老朋友都要照顧嗎.  其實中秋過後, 我老爺對腳就已經開始甩皮, 由膝頭對落開始, 腳跟腳底更加係"重災區". 今年咁早就開始裂, 攪到奶奶開聲, 要我整d膏比佢搽.

"女皇"有命, 緊係即刻去做.

研究配方所得, 咁嚴重既乾裂, 一定要用上高比例既油先得. 平常既乳液係幫唔到. 咁樣製作既方式會複雜左, 好在之前累積左一定既經驗, 難係難d, 不過都比我攪點左.

登......登......登.....

深層手足修護(夜)霜出爐啦~

顏色係好討人喜歡既雪白! 味道係清香既檸檬薑味.

用咩來做既???? 都係天然既野, 不惜工本, 超過一半係油來既. 包括有: 

冷榨有機椰子油: 含豐富月桂酸（lauric acid), 不僅易於被皮膚吸收，發揮明顯滋潤作用，更可助去除表面的已死細胞，促進新皮層生長，使皮膚光滑亮澤。椰子油亦可強化皮下的結締組織，有優良療癒和修補功效，使皮膚豐潤，減少皺紋；同時可防止有害的自由基形成，預防由陽光或老化所致的皮膚色斑。有助去除死皮，令皮膚回復彈性，光澤亮麗

甜杏仁油: 性質溫和、易吸收，富含礦物質、蛋白質及各種維他命，滋潤效果極佳。能有效減輕皮膚發癢現象，消除紅腫、乾燥和發炎。

可可脂: 源自可可豆中之天然脂肪物質, 具良好滋潤及保濕效果，能在肌膚表面形成保護膜、軟化及滋潤肌膚。

蜂臘: 由蜂巢提取之天然物質, 具抗菌, 消炎止痕, 軟化肌膚及促進組織再生的功能。

精油就用左 "檸檬" 同"薑".

檸檬精油: 可去除手腳部突出的疣, 治療敏感皮膚, 修復粗糙的手甲趾甲, 去除凍瘡, 並具消毒作用, 能除去暗沉及老人斑, 有溫和美白作用, 讓肌膚更明亮。

薑精油: 促進血液循環, 解除疲勞, 舒緩疼痛。

我教老爺: 每日沖完涼, 就搽落腳, 乾既地方就搽多d, 輕輕按摩一下, 用手溫令d油可以滲透入皮膚. 順手搽埋手指/指甲邊, 最好著綿手套/綿襪訓過夜, 等精油一晚發揮療效. 如果磨下對腳之後再搽, 效果會更明顯.   

老爺好乖咁日日搽, 睇怕佢都真係裂得幾痛下.  用左兩星期, 小腿既甩皮情況有改善, 滑返好多, 無再"雪花飛飛". 腳跟亦無乾得咁勁.

好野我緊會同朋友分享, 其實有返d年紀,  大部份人既腳跟都有唔同程度既乾裂, 尤其係仲意著涼鞋/拖鞋既人士, 大部份人平時都忽略腳部既保養, 正所謂"觀音頭, 掃把腳", 要直至到轉季, 乾裂甩皮或者腳痛啦~先知道要搽野. 

腳裂甩皮係有苦自己知, 無啦啦唔會伸對腳比人見,  雖然唔係大問題, 不過係困擾既問題, 除左痛, 最驚係有d情況下要除襪, 比人睇到曬就真係....... 

所以 一於整多d, 等大家都試用下

朋友J拎左一樽, 搽左3星期, 好開心咁話我知, 佢對腳板底改善左好多.

以下照片可能引起不安, 敬請留意!

用之前佢對腳係咁樣, (我覺得)都幾得人驚下~ 裂成咁樣, 再唔攪一定會流血.

搽完三星期後變左咁樣:

真係靚返好多~ 個"裂口"生返埋.

幫到佢我都好開心~即刻比多一樽佢, 希望可以搽好佢. 之後keep住保養就得啦~

如果有興趣, 可以留email比我.