慳錢生活．衣(二)

再講點樣節衣

2. 著來著去果幾件

上回講到要限制儲衣空間. 有blog 友就問: 咁咪會攪到著來著去果幾件.

無錯, 就係要攪到自己咁樣. 其實我地"需要"既唔係太多, 係"想要"既太多. 由於儲衣空間有限, 就會焗住自己去執好d衫. 只有最常著既衫先至可以留低.

如果你認真執下衣櫃, 會發現經常著既衫真係來來去去果幾件, 塞實衣櫃既衫其實好多一年都著唔到幾次, 例如: 節日著既衫, 出席宴會既禮服, 冬天既大褸 (好多人有好多件包括長褸, 短褸, 中褸, 風褸, 羽絨褸, 皮褸......等等, 每種都有幾件), 有記念價值既衫 (阿囝BB果時著既衫, 唔捨得比人等等), 去旅行滑雪買既雪褸, 公司 annual dinner 既晚裝, 化裝舞會既衫等等.塞到個衣櫃實一實.

另外仲有d係因為種種原因( 肥左, 瘦左, 無場合岩著, 無鞋襯, 有d過時......), 幾年都無著過 因為有空間就留低, "幻想"可能某一日會著返. 

我會乘轉季時大執衣櫃, 如果有1年都無著過既衫, 盡量會送出比人, 無人要忍痛都要送去回收.

同mark數既原理一樣, 節衣既第一步係: 分門別類, 執好衣櫃入面既衫, 分清楚邊d係日常著既, 邊d係間中著, 邊d係一兩年都無著過既.

咁樣分左d衫先. 你會好清楚邊種類既衫適合自己, 成日著, 第二時要添裝, 都係買果種. 咁就唔會因為sales 落嘴頭, 雜誌講潮流興, 一時衝動又買左. 

下次再續.......