工展會2010 (上回)

好快又一年, 工展會又來了. 今年一樣有免費入場卷, 不過因為超忙, 無咩時間做功課, 係咁依上官網睇下, 印左d優惠名單出來, 帶左"戰車"現金同阿囝(今年死都要跟埋去)就出發. 聽講d野貴左, 所以心入面無打算會買好多野, 都係去買返舊年果d野.

結果買左呢一堆, 總共: $224

準時十一點入場, 行程係: 香港名牌區==>糧油麵食區==>食品飲料區. 因為經驗所得, 依三區會越來越多人, 特別係食品飲料區, 到十二點左右, 真係逼到插針都唔入, 根本買唔到野. 

一入場就見到李綿記檔口(1B60-68), 開賣$1包火鍋湯包. 條龍只有十幾人, 一於排隊啦~ 唔洗5分鐘就買到啦~一人限買四包, 我地買左8包. 盛惠 $8

 

睇返張一元產品大優惠名單, 隔離同珍(1B69-80)都有$1買同珍王字蠔油(180克)一支,

不過點解無人排隊既?? 一問之下, 先知原來要有"書仔"上面既優惠卷先買到. 我地係用贈卷, 無書仔所以買唔到.

跟住去左(1C05)買 "漢廷加拿大健康精瘦臘腸(頭抽風味)(454克)", 聽講幾好, 囝囝仲意食腊腸, 平平地下$25包, 可以試下.

跟住去左 2C23-24 "冠益華記廠" 入貨. 用入貨來形容無錯, 因為我買左八枝蠔油+兩枝辣椒醬. 因為食開, 年年我都幫襯. 因為係工展會, 蠔油買一送一, $20 2支 (平時超市要$16.90/枝), 辣椒醬就$22 兩支 (平時超市$17.xx/枝). 雖然比起舊年, 每支都加左$1. 不過圍起都平過出面, 當然要入貨啦~ 盛惠 $102.

仲有野送:

路經"嘉頓"檔口, 見到有囝果至愛既依個餅, $25 兩包. 平時超市賣$14.90-$16.90一包. 見平左一節, 又買兩包比佢食.

再經過美味棧, 買左包紫菜(岩岩屋企食曬). $10包.

轉戰食品飲料區, 係轉角一個檔口, 見到去年返大陸時買過既"八珍果", 囝囝兩眼發光, 因為佢好仲意食, $20 3罐. 又買. 依隻八珍果好醒胃, 過時過節食完大餐, 食返兩粒好消"制". 

邊行邊睇, 兩邊不停咁有試食~ "食啦~試下啦~"就算你唔想, 都一樣照塞比你. 豬肉乾, 咖啡, 果汁....... 

邊食邊睇, 睇睇下, 有個檔口賣東南亞食品, 阿姐話金邊粉做特賣, $2盒, 又試下. 一盒有3包, 有埋湯料. 好過食即食麵. 盛惠$4. 

再去"添寶"檔口買左三盒鳳凰卷 $30. 兩盒咖哩, 一盒紫菜. 年年我都幫襯買三盒蛋卷過年送禮. 不過車仔已經飽和, 留返下次先買.

呢包餅仔係免費, 阿囝行左一半叫"攰", 我要佢撐落去, 因為一早同佢講左, 係佢自己死都要跟, 咁要自己負責到底, 我唔會就佢提早離開. 唔知邊個檔口阿姐見佢個樣唔開心, 請佢食既.  

因為已經一點幾, 人開始多, 醫左肚就走. 今年無"陳記", 阿囝話唔餓, 因為一路試食佢都飽左, 食左碗"豆腐花" $6, 我就食左"龍皇酒家"既鐵板豉油皇炒面 $15,

酒家師傅即場炒, 新鮮好味, 抵. 有一盒( 食左一半先醒起影相) 銀芽好爽口. 阿囝話飽都食左幾啖.

路經"金燕牌"檔口, 不過無買. 價錢比平時超市平幾蚊.

仲有一張入場卷, 會再去多一次

朋友報料,  4C07 阿斯麥香港有限公司 魚油 $550 兩樽 (220粒). 比平時萬寧賣平成半. 如果食開就好去買, 抵好多. 2013年到期, 買滿 $1000 送淘磁刀. $2300 送按摩帶 .

另外舊年我有買, 今年加價既有:

1. 台式一口腸, 舊年$50 5包. 今年 $$50 4包. 無買

2.  添寶檔口買既麥皮, 舊年$40 3包, 今年$30 2包, 無買.

3. 詩樂氏萬用洗潔精, 舊年 $15, 今年$18, 無買.

4. 林記花菇, 唔靚, 無買.

5. 林記青島貝, 貴又唔靚, 無買.

6.  "沙嗲王"XO辣椒醬, 舊年 2樽, $10. 今年$6樽, 無買.

生活家居無咩特別, d野平時街邊都有得賣. 美保健亦無野岩. 囝囝係"兒童天地"見到有檔展出機械人, 玩左一陣. 真係幾好玩.  

 雷達行超智機甲

下回再續.