免費節目之軍營開放日

聽日五月一號紅假, 又係出動帶埋d 細路搵節目既日子. 我知道註港解放軍三個軍營都會免費開放. 其實以前睇新聞報告, 知道節目都好豐富, 又岩囝囝玩, 可以大開眼介. 不過一諗到要好似咁晨早去排隊羅飛就怕怕.

解放軍軍營開放日門票派發 (明報) 04月 29日 星期日 09:15AM

駐港解放軍    五一勞動節開放赤柱.昂船洲和石崗軍營予市民參觀，吸引約200名市民在添馬艦軍營外排隊。門票在8時30分開始派發，排頭位的市民昨晚11時已開始排隊。

今年好彩, 有個朋友有飛, 早幾日問我地要唔要. 唔洗辛苦去輪飛, 緊係lu飯應啦.上網查下有咩節目先:

赤柱軍營活動：升國旗儀式，兵器操作表演，拳術團體操表演，刺殺團體操，武器展示，參觀文化活動中心和連隊生活設施，小菜糕點製作及播放駐軍短片。

昂船洲軍營活動：升國旗儀式，軍樂隊列表演，槍械團體操表演，足球友誼賽，文藝演出，武器展示，參觀艦艇和連隊生活設施，國防知識及夏令營圖片展，播放駐軍短片。

石崗軍營活動：升國旗儀式，偵察兵拳術表演，偵察兵反恐突擊行動演練，威風鑼鼓及舞龍舞獅表演，籃球友誼賽，武器展示，參觀模擬訓練中心，連隊生活設施和文化活動中心，小菜糕點製作及播放駐軍短片。

再查到舊年去過既人咁寫:

http://www.kwuntung.net/tthp/life/life_details.php?TitleID=248

有槍玩, 有表演睇, 每名遊人還獲贈鴨舌帽、瓶裝水、飯盒 , 正啊~真正係免費又玩又食又拎~~

邊個偷左你d錢?(五)

5. 狂洗衫

有次同朋友傾開, 佢呻水費好貴, 過千一季. 佢屋企得5個人, 點解用咁多水我屋企4個人就二百幾蚊一季, 差4倍. 再傾下, 佢話一日要開2,3次洗衣機洗衫. 邊有咁多衫要洗啊~~佢先數比我知: 一人一日一套衫, 沖澡每人一條大毛巾, 一條洗面巾, 一星期換一次床單被袋枕頭套, 加埋睡衣, 底衫......等等.

聽佢講完就明曬啦. 咁洗法, 水費緊貴啦, 香港係越用得多, 每度水收得越貴. 洗少d得唔得啊~~唔得, 原因係"烏糟". 去街衫唔計啦, 其實沖完澡抺身既毛巾有幾"烏糟"呢?? 理論上應該係沖乾淨左個身先抺身嫁~~何來"烏糟"呢~~佢話無諗過~~

咁洗法, 除左水費好金, 仲有電費, 洗衣粉, 人工, 時間, 衣物既損耗等等.佢仲用埋乾衣機, 果D電費都未計出來.

邊個偷左你d錢? (四)

4. 冷/暖氣長開

可能大家都已經唔習慣洗汗. 夏天放工一入屋就開冷氣, 有小朋友果d家庭, 全日開住冷氣既大有人在. 一個月二千幾蚊電費都有人試過. 唔開得唔得?? 點得啊~~無冷氣會死嫁~~d錢就跟住個電表一路轉一路咁跌左. 其實大家係睇唔到電表跳, 去科學館有個"水表"睇. 可能要睇住個表跳, 先會感受到d錢一路咁流走.

冬天就成晚開暖爐啦~~ 舒服啦~~就係要付出代價.

超市超貴

早排有個報告, 話超市d野成日話減, 其實貴過d藥房是多好多. 我諗有買開野既c9唔洗睇報告都知啦, 好多野超市食水真係好深啊~~真係隨手都可以寫個報告啦

1. 罐頭

完全唔洗格價, 因為無論超市點減, 整體都貴過街市好多. 以我成日買開果d為例:

地捫 菠蘿片, 超市特價: $6.90, 街市凍肉鋪長期價: $4.5

計下條數: $6.9-$4.5=$2.4/$4.5= 53% 超市貴咁多.

再來另一樣:

地們 粟米粒, 超市特價: $10.90, 街市凍肉鋪長期價: $5.5

計下條數: $10.9-$5.5=$5.4/$5.5= 98% 超市貴一倍咁制.

2. 雞蛋

中國 新鮮盤裝雞蛋, 超市特價: $24.90, 街市凍肉鋪長期價: $20.

計下條數: $24.9-$20.0=$4.9/$20= 24.5%

 

3. 嬰兒用品(包括尿片奶粉濕紙巾)

又係整體都貴過藥房好多. 就例如:

健力氏皇牌 學習褲加大碼女, 超市特價 $79.90, 藥房一般長期價: $50-$54.

計下條數: $79.9-$50-54.=$29.9-25.9/$50-54= 59.8%-47.9%

就算超市做孖裝推廣, 都要$139 兩包, $69.5包. 都係貴39%-28.7%.

奶粉就以依隻為例:

美素佳兒 金裝美素樂2號  超市特價$149.00,  藥房一般長期價: $119

計下條數: $149-$119=$30/$119= 25.2%

4. 個人衛生用品

好似牙膏牙線洗頭水沖涼液, 一定係藥房平過超市. 例如:

獅王鹹味 清涼薄荷牙膏, 超市特價: $20.90,  藥房孖裝$36, 加送一支細漬脫牙膏.
計下條數: $20.9-$18=$2.9/$18= 16.1%. 贈品都未計啊~~

洗頭水又係, 好似:

潘婷 滋養防掉髮洗髮乳 超市特價:33.90,  藥房一般長期價: $26

計下條數: $33.9-$26=$7.9/$26= 30.4%.

寫住咁多先. 

點樣先儲到錢啊 (一)

成日都聽到人地呻: 點樣先儲到錢啊~~其實我都好想儲, 不過硬係儲唔到.

其實儲得起既錢, 大部份人就係: 收入-支出= 儲錢. 好易既數學題姐.

咁想儲多d $, 一係增加收入, 支出不變, 剩到既錢就自然會多左. 你話搵唔到多d錢, 咁就唯有減少支出, 收入不變, 剩到既錢亦會多左. 不過依兩個因素當中, "支出"部份係大部份人最難自控既. 硬係會唔知點解洗大左既.

如果你係依種人, 咁就要轉用另一個方式, 就係: 收入-儲錢= 支出. 即係一出糧就扣左要儲既錢. 目標因人而定. 例如: 10000-1000=9000. 最好做埋自動轉帳, 一出糧就扣起轉去另一個戶口(最好無提款卡既). 你最好直頭忘記左佢, 當自己搵9000蚊咁來洗.

亦可以用水嚨頭(來水) & 去水位 來形容收入, 支出, 儲錢三者既關係(我睇書睇返來既). 你個水喉開大左(收入), 去水位無變(支出), 個浴缸就自然有水剩啦~相反水喉開唔得大, 去水位加個隔, 去水去得慢d, 浴缸亦會有水剩.

亦有人係: 水喉開大左(收入), 去水位亦同樣整大左(支出), 好多中產人士都係依種, 你見佢搵得多, 家庭收入十幾萬, 不過支出同樣都係驚人咁大. 每次收入增加左, 自己又將支出整大d (食好d住好d), 同樣都有儲唔到錢既煩惱~~

儲到錢既人就係 : 水喉開大左(收入), 去水位唔整大(支出), 個浴缸就越來越有水剩啦一係就開多幾條水喉(多份收入), 去水位唔變, 一樣有水剩.

邊個偷左你d錢? (三)

3. 慶祝xx節/生日/記念日/xx??週年

身邊好多朋友都好注重慶祝各種既節日. 慶祝既方式都係出街食飯/買禮物依d咁羅. 不過一年大大小小既節目其實已經夠多啦 (聖誕/冬至/新年/元宵節/情人節/復活節/母親節/ 父親節等), 加埋自己 & 屋企各人既生日, 結婚記念日, 拍拖記念日, 註冊記念日. 相識記念日...............等等, 真係不得了.  

請真啊~~我覺得咩都記念一餐真係又傷荷包又傷身. 先係要煩點樣慶祝, 要諗下買咩小禮物(成日都送, 預算自然唔會定得高), 真係諗到頭都爆. 又要用時間去買/慶祝. , 收到果d禮物好多時又唔係心水或者需要, 最後既結局咪又係丟埋一二角封塵~ 

到某一日執屋發現返, 就來手丟入垃圾房. d 錢就係咁樣就丟左出街.

邊個偷左你d錢? (二)

2. 出街食飯

有d 朋友真係好仲意食, 3日唔埋2日就聽佢話出去食飯, 打邊爐, 自助餐, bbq, 壽司, 海鮮餐, 無一不好. 你叫佢買股票去旅行啊佢實話無錢啊~~不過你問佢點解要成日出街食, 佢就話食佢好"捨得".

出街食一餐, 閒閒地都要兩三百蚊, 一個月去十次八次(淨計一個人), 都無左3幾千蚊啦. 搵得果萬零蚊人工, 又點會有錢剩呢~

邊個偷左你d錢? (一)

身邊既朋友成日都有人咁樣講: 唔知點解硬係儲唔到錢, d錢唔知洗曬去邊到. 唔知~~唔通有人偷左你d錢咩~~再講落去, 各人有各人跌錢既原因:

1. 掃街

有d朋友真係好仲意食街邊野, 日日放工路經, 見到d檔口賣燒賣, 牛雜, 串燒, 魚蛋, 格仔餅, 生菜魚肉, 碗仔翅......等等, 都會忍唔住食返d, 跟手買杯果汁飲下. 有時食開唔止買一樣. 係~食依d野好少錢, 不過日日如是, 計埋都唔少, 加埋每次都要二,三十蚊, 有時唔止. 一個月起碼吃左六七百蚊.

就係每次少少, 你自已唔覺唔覺就跌左d錢.

蝦仁炒蛋 ($12)

依味我自己好仲意食, 又易整:

材　料: 鮮蝦半斤($8)   雞蛋 4顆($4)    青蔥 少量(唔洗錢)  

調味料: 鹽 1/2茶匙   雞粉 1/4茶匙  米酒 胡椒粉 少許

做　法
1.已處理既蝦用米酒、胡椒粉醃一下。雞蛋打散加鹽調勻。
2.熱鍋放入2大匙油，放入蔥末爆香, 再放入蝦仁快炒約1-2分鐘至熟。倒入蛋液煎至8分熟後盛起。

我通常買返來處理左先(去殼與腸泥), 分2份放入雪櫃, 要用時拎出來解凍, 再用紙吸乾水..

無錢啊~~

"無錢啊~~" 好多人都會咁講: 不過我觀察到講依句話既人可分2大類:

1. 一類人係, 當你問佢不如一齊去消費, 例如旅行, 食自助餐, 唱K, 買衫, 買手袋......等等, 你會聽到佢話: "無錢啊~~" 不過當你同佢講話去投資, 例如抽新股, 買債卷啊咁, 佢就好有興趣, 仲可以十手八手咁樣抽.

2. 另一類人就倒轉, 當你叫佢一齊去投資, 例如抽新股,  買債卷啊咁, 佢就會苦口苦面咁講佢都想, 不過無錢啊~~不過一話去消費, 就即刻精神曬~~好啊好啊咁答人, 即刻去做添.

兩種人都話自己無錢, 唔知你係邊一種.

番茄肉碎煮豆腐 ($17.5)

 

依排連食米都話加價三成, 真係好誇張啊~~生活真係唔易過. 唔慳慳地過日子都唔得.

依味我屋企又係成日煮, 有依個送, 老公同仔仔食飯都零捨快既..

材料 4人份量
1- 豬肉碎 ($10) 
2- 中型鮮蕃茄3個($5)
3- 豆腐1磚 ($2.5)

汁料 :
1- 蠔油 1 湯匙 
2- 生抽 1 茶匙 

3- 糖 1 湯匙
4- 水 2 湯匙

做法:
1- 先將豬肉碎用基本野醃一醃
2- 快火落油起鑊, 炒熟豬肉,

3. 再炒蕃茄.
3- 加入豆腐及豬肉, 落汁料兜勻, 加蓋細火煮10分鐘, 加上蔥花即成.

煮出來都幾多下, 食唔曬我仲可以第二日帶飯.

平奶粉

真係好誇張~~香港地竟然有錢都買唔到BB奶粉, 要限買~~早排上左報紙頭版. 真係估唔到. 缺貨既主要係A+ &雅培. 唔怪之得早排見萬寧奶粉貨架放得好少貨, 望落去怪怪地, 不過以為佢地特登唔放咁多姐, 世估唔到係因為"缺貨".

我完全感覺唔到"缺貨", 係因為真係好耐好耐(已經唔記得左幾耐)無去藥房連鎖店買過奶粉. 何解?? 因為我用左一個買奶粉慳錢既途徑~~就係"換購"啦.

早幾年開始, 萬寧屈記都成日都有BB展, 買任何BB野就可以加錢換奶粉. 當然換購既唔係最紅果d牌子啦. 我研究比較過各奶粉牌子既成份(睇果d好細隻字既產品成份), 發現其實隻隻都係差唔多, 再換罐比BB試飲, 發現佢又照飲. 於是每次有換購都大手入貨.

可以慳幾多? 正價奶藥房最平賣$102 (900克), 換購果d 就$30 (400克), 轉換為900克即係 ($30/400g)x900g=$67.50. 咁講明換購當然係要買BB野啦. 我就買細包濕紙巾 $5.9. 加埋都係$67.50+($5.9x2)=$79.30.

差額係$102-$79.30=$22.70 (28.62%). 平足2成不特止, 我仲多2包濕紙巾用添.

近期可能出生率再跌, 換購既物品仲有埋BB洗頭水, 沖澡液, 尿片等等, 慳得仲多.