行花市, 學講價

今日年三十, 約左阿囝d 朋友仔(&媽咪)一齊去行花市, 我地講好每個小朋友比$20筆直佢地自由選擇買咩野~~

坐地鐵去緊既時候, 我同囝囝講左有$20任佢洗.

佢問我: $20買唔到d咩野~~

我答: $20係花市都買到野嫁~~仲有, 你知唔知花市買野係可以講價嫁~~如果你睇中左果樣野係超過$20, 都可以試下同檔主講價.

佢又問我: 點樣講!

我答: 你問佢"可唔可以平d啊"咁樣羅.

佢細細聲咁學講: "可唔可以平d啊"

我話: 你咁細聲檔主聽唔到嫁~~要大聲小小先得. 不過都唔可以大叫出來嫁~~

入左花市, 行左幾檔, 佢見到風車檔就行埋去睇, 跟住問人地幾多錢啊~~人地答 $38. 佢就講: 可唔可以平d啊~~ 人地再問: 即係幾多啊~~ 佢答: $20. 人地答佢: 唔得啊~~佢就走過來同我講: 媽媽, 唔得啊~~ 我話: 唔緊要, 前面應該仲有好多檔係賣風車既, 再睇下先啦~

再行下好快又見到一檔, 佢行埋去又試又玩左一陣, 同行既小朋友都想買, 一問個價錢: $28, 又超支~~佢地就行開左先. 阿仔仲係處死磨. 我問佢係唔係想買啦~~佢點頭話係. 我叫佢問下幾多錢羅.

佢問個姐姐, 姐姐答: $20 蚊啦~~(原來款款唔同價).

阿囝又講果句: 可唔可以平d啊~~

姐姐諗下答: 唔......$15蚊啦~~

阿囝好開心咁轉身望下我. 講價成功~~我比$20佢找數. 買到依個雙層既"彩虹風車":

跟住我地追返朋友仔, 同佢地講我地講價成功~囝囝仲有$5剩添. 佢媽咪都鼓勵佢下次都試下講價. 大家再行多幾行, 朋友仔睇中左個紙巾套, 一問個價: $25. Oh! 又超支. 點算呢~~朋友仔媽咪叫佢去講價, 佢行到埋檔主前面, 諗諗下都係怕羞講唔出口, 轉身話唔講價啦~~依個時候, 妹妹又指住同一款式話佢都好仲意.

企係一邊既囝囝出聲: 我幫你講好唔好啊~~朋友仔當然話好啦~~

佢行埋去個檔口前面, 抬高個頭望住檔主問: 依個幾多$啊~~

檔主望下佢: $25羅.

佢又係果句: 可唔可以平d啊?? $11 得唔得啊~~( 囝, 你有無再狼d啊~~)

路人甲都忍唔住出聲講: 嘩~~你咁識講價既~~

檔主望下佢, 好串咁答佢: 送比你好唔好啊~~細路~

佢望下檔主, 好平靜咁樣再還價: 咁$12蚊啦!

檔主無佢咁好氣, 答: 你洗唔洗一蚊一蚊咁樣講價~~(我死忍住笑)

佢再講: 咁$15蚊啦~~(聽檔主話, 一加加多左$3蚊啦)

檔主都係串串咁話: 唔得啊~

(朋友仔媽咪靜雞雞同囝囝講: 你還佢$20蚊啦~)

囝囝再講: 咁$20蚊啦~~

檔主望住佢諗左一陣, 把心一橫咁講: 好啦~~好啦~怕左你啦~~$20蚊就$20啦~~

跟手仲將個$25價錢牌meet埋添.

好野~~又講價成功. 妹妹同朋友仔都用左佢果$20買左依個:

檔主改左價, 圍係檔口既人一湧而上, 好多人都比錢買. 可能囝囝係幫左佢去貨都未定  

囝囝既表現係我完全估唔到既. 後來我問佢點解要出價$11. 佢話係因為想幫妹妹慳返$9. 咁樣妹妹可以有錢再買多一樣野.

原來佢企係一邊果時已經計過曬數既. 今次行花市真係收獲不少.