日式芝麻醬拌冷面($12/$6)

今年天氣真係特別熱, 岩岩過左既八月係幾十年來最熱既, 真係熱到個人都無胃口~

咁熱既天氣, 自然就想食涼野, 不如就整下冷麵啦~

以前係日式拉麵店都食過冷麵, 就照板煮碗來整啦~以我記憶所及, 日式冷麵既材料有(兩大兩小份量):

日式拉麵4包($8), 溫室小青瓜2條($2), 蛋2個($2), 蟹柳 4條($4), 火腿3片($10), 蟹籽($4)適量, 即食紫菜1小包, 日式芝麻沙律醬適量(約$6)

做法:

1.  煲一煲水, 水滾落麵, 邊煮邊攪拌, 防止麵黏埋一齊。 煮到8分煮(你要夾起來試下), 過冷河, 隔水待用.

2. 青瓜洗淨切絲, 火腿片及蟹柳用凍滾水略沖後切絲, 蛋成煎蛋皮切絲, 蟹子解凍後隔水備用.

3. 將(1) (2)材料放入雪櫃雪到凍. 取出排好.

話咁快就得左~~就係咁樣.

d顏色都幾靚下~

再按各人口味拌入芝麻醬.

老公話: 食一啖先~~唔......好味啊~~

又滑又彈牙既麵, 冰涼既配菜, 芝麻醬既香, 混埋一齊味道好夾啊~ 成本價 $12.

拉麵, 蟹柳, 蟹籽, 日式芝麻醬都係日式批發買既, 價錢先有得咁平. 

日式芝麻醬係1.8公升一支, 我同同事朋友四個人分一支. 除左整冷麵, 用青瓜, 蟹柳, 蟹籽, 粟米加日式芝麻醬, 就成為"日式沙拉".

 

蟹籽1kg 一包, 都好多下, 我同朋友一人分一半.

每一粒都好飽滿.

除左加入冷麵中, 炒飯既時候加d, 食起上來口感好特別. 當然仲可以整"壽司"啦~