400萬x2 ??

養一個要400萬, 兩個咪要800萬歲嚇死人咩~~唔怪得身邊d朋友好多都話唔生啦, 驚養唔起~~

我地生大仔既時間, 經濟唔好, 又減薪又裁員, 市面一片恐慌. 老公d同事直頭話佢係: 淡市奇葩. 當時心入面都係諗住死就死啦, 又諗起阿爸阿媽以前咪搵得仲少, 一樣養得起我地. 無理由家下我地養一個養唔起姐.

當然要"慳"字掛帥啦. 第一樣就係厚住面皮開聲問表姐借大肚衫, 估唔到佢塞都塞唔切咁比曬我, 因為佢覺得d衫好左定, 丟左又可惜, 因為買果時好貴. 真係一家便宜兩家著.

隨住個肚大, d親威朋友知道我咩都未買, 就陸續將d二手BB用品"塞"比我, 包括BB床, bb車, 奶樽, BB衫褲鞋襪, 玩具......等, 尿片就係去醫院/健康院做產檢時, 有好多公司會搵人叫你入會, 送sample, 淨係各大尿片商都送左十包八包片, 幾乎所有物資都齊, 到阿B出世時, 我依個做阿媽只係需買左件2件羊毛底衫+沖涼液 (後來都有人送左來)比佢. 加上係政府醫院出世, 生佢埋單都係$210.

計我話生仔一d都唔貴. 養仔又點樣呢~~再講.