書展後感

全城熱哄既書展終於都過左去啦. 我最終都無去到. 點解?? 其實一開始都心郁郁想去, 亦上網睇下人地既收獲. 不過內心有交戰:

慳．魔鬼: 去啦去啦, 一年一度, 一次過睇曬咁多出版社/書局既書, 折扣又多, 又多贈品.

慳．天使: 書係多, 但自己真正需要既有幾多呢? 要比入場費, 未見官先打三百. 如果唔係買得多, 慳埋都唔夠比入場費, 又要特登搭車去, 車錢時間都要計埋嫁~~太多選擇, 現場多人買野, 羊羣效應, 一個唔小心, 把持唔住, 好易買錯/買得太多. 買得多, 又拎餐死. 果d贈品, 講真有幾多你係用得著嫁~~無無謂謂又左定.

慳．魔鬼: 入場費洗幾錢姐, 好心你啦~~唔買比自己, 買d書比阿仔都要嫁~仲有睇下d補充練習都好啊~~

慳．天使: 買書比阿仔? 你唔記得左啦, 有次書展, 你千簡萬簡果d"自以為"阿仔會仲意既書, 買左十本八本, 最終得一本係阿仔仲意睇既,  D書唔睇, 仲塞曬係書櫃, 左住曬. 要睇書, 圖書館大把你借. 借左如果阿仔唔仲意睇, 還左就算, 一了百了. 佢d口味轉得咁快, 加上睇完一次又唔肯返睇, 買來做咩啊~~補充練習? 佢做得幾多本啊~~上次搭人係觀塘書倉買果d都未做完. 屋企附近商場又成日有"書檔", 有需要先去買都未遲.

慳．魔鬼: 除左書, 仲有其他文具/新產品啊~~都要買d嫁嗎~~

慳．天使: 文具? 舊年爸爸去書展, 買左果d筆都未開來用. 同埋d價錢都唔係差好遠, 唔需要特登係書展買. 仲有上次佢買左支所謂"特別設計"既鉛芯筆, 用過都無咩"特別", side 錢.

最終慳．天使勝出, 無去到.

我d朋友有人因為有免費入場卷, 前後去左3次. 次次都大出血. 去到點可能唔買野啊~~亦有人特登請假去. 我覺得大家似去襯墟多d, 熱熱鬧鬧, 開開心心, 買啊買啊~~唔好比佢停啊~~

BB展免費禮物

蘋果8月7日coupon(娛樂版C3)可於bb展換領以下禮品

Pampers NB 36 pcs 1包 (200 bags/day)
K's Kids - 磁力碰碰船 (50 pcs/day)
Papa Jelly C 60 pcs 1盒 (120 boxes/day)
新西蘭VC牛之初乳20 pcs 1盒 (60 boxes/day)
Lactacyd 女性衛生潔膚液150ml 1支 (150 boxes/day)
毛巾+環保袋+保溫杯 (100 sets/day)
除疤膏禮物包 (68 sets/day)

要去既人買定報紙啦.

茶籽粉 Sample

茶籽粉 Sample

http://www.theeden.net/index.htm

岩用就去登記啦.

無食晏

今朝食左個早餐--炒米粉($7), 賣米粉既阿姐比左一大盒我, 食完好飽啊~~依檔賣早餐係新開既, 一連幫襯左好多日, 佢已經認得我. 我覺得阿姐越比越多我, 唔知關唔關早幾日我見佢炒到身水身汗, 出聲慰問左佢.

到食飯時一d都唔覺餓, 諗住去完圖書館, 晏d先食. 點知搵書搵得太開心, 返來已經得返15分鐘, 見個肚又唔餓, 諗下不如轉食下午茶, 又平d~~

做做下野, 抬頭一望個鐘, 原來已經4點. 都未見餓, 不過都係時候鬆一鬆, 就係公司雪櫃拎左盒朱古力奶飲, 食返一小包餅乾. 咁又慳返一餐~~ 一路到食晚飯都唔覺得特別餓.

唔餓就唔食

其實自己間中, 特別係放假既日子, 都會特登唔食早餐, 淨係飲水, 等d腸胃休息下(自己既腸胃唔多好), 又當係 keep fit. 唔食一餐其實唔會特別覺得餓, 可能平時食得太多啦~~

{樋屋奇應丸} 免費試用

http://manhing-hiyakiogan.mixmedia.com/

岩就去換啦.

日式漢堡扒(每個$3.2)

材料: (冰鮮)碎豬肉 400克($16), (冰鮮)碎牛肉 200克 ($15), 洋蔥一個($2), 雞蛋一隻($1), 面包糠一小碗($2.5), 牛油一湯匙($2)

做法:

1.  洋蔥切碎, 將所有材料放入一個大盆, 用手攪拌, 再拎起大力達至起膠.

2. 用手將材料整成肉球, 再輕輕壓偏, 中間再用手指略壓一下.

整好啦. 整到12個. 可以放入冰格雪. 要食時先拎出來煎

煎法:

係冰格拎出來, 用細火慢慢煎, 千萬唔好心急, 因為有面包糠, 火一大就好易"燒焦"煎好成個肉餅會谷返圓(因為加左蛋). 再加小小水同埋番茄醬煮一煮. 上牒啦~~

依個餸我家大細仔都好仲意. 我亦仲意整, 點解? 因為可以一次過整定, 要食果時煎一煎就得. 慳功夫~~

唔仲意食番茄醬, 可以隨你轉其他汁料. 送飯或者意粉都得.各式其式. 做漢堡包都可能得, 我未試過啊~~

註:

1. 整依個"扒"一定要混合豬肉 & 牛肉, 咁先好食, 點解用"冰鮮"肉, 因為反正都要冰係雪櫃來慢慢食, 冰鮮肉平d~~ 

2. 面包糠我用日式果種, 吉之島有得賣, 大包又鬆身d.

3. 一定要"出手"攪, 唔係唔好食.

另外, 今日係惠康買到既冰鮮豬肉碎係$10.9包. 做半價. 未試過咁平. 我買左2包. 所以今日整既漢堡扒成本可以減少至@$2.8

換購維多C

我屋企常備有"維多C"水溶片, 開始做傷風時飲一杯, 真係鎮得住唔發病嫁~~雖然唔平, 2支共30粒裝, 最平$79到, 我都會買.

今日係屈記見到有換購, $19.9 1支15片裝. 嘩~~平好多啊~~問個職員, 佢話買任何"健康"產品就可以一換一.

健康產品包括藥品, 於是我搵左d需要用既野,

買左2 pack "撤隆適"膏貼(3片裝), @$9.9 (除開每片都平過原裝大包果d)比阿媽, 2包喉糖@$4.9 比老公, 換購左4支"維多C"水溶片. 我見係09年6月到期, 估計4支一定飲得曬.

總共$109.20. 2份都只係$55, 都平過原裝果d($79)一大節.

岩用既就快去買啦. 換購完就無嫁啦.

ps: 4/8 今日萬寧都有得換購, 買任何一樣野就得啦.