將"慳"變成為習慣

星期日帶囝囝出街, 一上地鐵我習慣又往車尾行, 行左2個車箱, 先至突然醒起: 係播, 又唔係返工, 洗咩行定先呢? 自己都覺得好好笑.  

人就係咁奇怪, 因為朝朝都係咁樣既動作: 上車轉身行向車尾方向, 習慣左之後, 身體就自動行動, 去到果個位, 就自動做埋下半part, 完全唔經大腦思考.

人其實真係"習慣"既動物, 好多時我地既行為係受自己既習慣所牽動, 而唔係經過思考先至行動既. 而我地既"消費"行為, 好多時亦係由"習慣"帶引. 好多人唔明自己d錢洗左去邊, 因為佢習慣左, 自動去做左而自己都唔記得/察覺.

以我所見, 依d習慣包括: 每日出街食早餐/飲茶, 行過街邊食d小食, 買杯飲品, 買小飾物(有d女仔每日都買), 返屋企開曬全屋既燈, 電視長開, 夏天入屋一定開冷氣, 沖澡沖足半個鐘, 每次有新戲都去睇, 每年一定去兩次旅行, 轉季一定買衫, 做facial整指甲, 換手機, 唱K......等等, 好多碌爆信用卡既人都知自己d錢用左去邊, 一d都唔奇怪. 因為佢地"習慣"左.

我諗起上次上電台接受訪問, 主持人麻利阿問我: 慳左咁耐, 你有無諗過要搵次放縱一下自己. 唔......真係無諗過播, 亦唔覺得需要.

人之所以需要"放縱"係因為覺得受壓抑, 所以需要釋放. 好似減肥時果時要忍口, 死忍死忍, 覺得好痛苦, 減左磅又即刻又食返野, 仲食得多過之前. 但係如果你平時既食量就係咁多, 又點需要食返多d 野呢?

慳錢已經係我既生活方式, 成為左"習慣", 變左自動波, 所有野唔需要思考就自動會去做, 完全無壓抑, 又何來需要"放縱"呢?  以上講果d "消費習慣"我全部都無, 相反, 有時需要提醒自己"應洗則洗", 因為一洗錢就會"肉赤", 有痛苦既感覺添~都係因為"習慣"左.

如果你想慳錢得來又無痛苦, 首先你要反醒下自己有咩"消費習慣". 改左佢. 開頭一定會覺得痛苦, 因為"習慣"左. 咁每次你選一樣來改, 習慣左再改第二樣. 持之以恆就一定得.

將"慳"變成習慣.