加左人工啦! 今年好多人都有得講依句.
好多人加左人工之後第一樣想做既事, 就係"買野". 我d同事有d就去左買衫, 手袋過年, 有d就要去旅行, 有d就想換屋企既家私電器.....等, 因為大家都覺得自己"富有"左.
其實冷靜落來計一計, 加果幾百蚊人工, 容咩易就洗左去啊~去一次旅行可能已經洗曬全年加左既人工, 分分鐘仲洗突添. 結果好多人到年尾都係無錢剩~
咁點樣先可以有錢剩呢~~我既方式係: 將自己加薪既金額減半. 例如加左$500, 我會當自己只係加左$250. 支出既部份就以此為預算. 另外果一半我會轉去另一個銀行戶口, 當無加過.
好似好阿Q咁樣呢~~
人既心理係好奇怪既, 如果一開始就當無, 咁生活一樣係咁樣過, 不過戶口就會儲到錢羅.
養一個要400萬, 兩個咪要800萬歲
嚇死人咩~~唔怪得身邊d朋友好多都話唔生啦, 驚養唔起~~
我地生大仔既時間, 經濟唔好, 又減薪又裁員, 市面一片恐慌. 老公d同事直頭話佢係: 淡市奇葩
. 當時心入面都係諗住死就死啦, 又諗起阿爸阿媽以前咪搵得仲少, 一樣養得起我地. 無理由家下我地養一個養唔起姐.
當然要"慳"字掛帥啦. 第一樣就係厚住面皮開聲問表姐借大肚衫
, 估唔到佢塞都塞唔切咁比曬我, 因為佢
覺得d衫好左定, 丟左又可惜, 因為買果時好貴. 真係一家便宜兩家著.
隨住個肚大, d親威朋友知道我咩都未買, 就陸續將d二手BB用品"塞"比我, 包括BB床, bb車, 奶樽, BB衫褲鞋襪, 玩具......等, 尿片就係去醫院/健康院做產檢時, 有好多公司會搵人叫你入會, 送sample, 淨係各大尿片商都送左十包八包片, 幾乎所有物資都齊, 到阿B出世時, 我依個做阿媽只係需買左件2件羊毛底衫+沖涼液 (後來都有人送左來)比佢. 加上係政府醫院出世, 生佢埋單都係$210.
計我話生仔一d都唔貴. 養仔又點樣呢~~再講.
簽卡買野就個個人都會做咁制, 但一定~~一定~~緊記得: 唔好欠卡數啊!
欠卡數既人真係好傻, 因為信用卡既利息真係非常~非常~咁高. 如果你只係還最低還款, "複息"既力量會令你還極都仲有.
你還比銀行既利息會多過你欠既本金.
唔想欠卡數, 方法:
1. 節制自己買野啦~~
2. 每個月準時還清卡數. 我自己就係一收單就設定預繳, 費事過期, 因為銀行收果個行政費都好甘下~~
3. 如果做唔到 (1) + (2), 咁就唔好用卡, 用現金好啦 (我老公), 因為要去羅錢好煩, 結果就可能買唔成.
識得用, 信用卡其實好好用:
1. 用來一張卡交曬屋企所有既費用(水, 電, 煤, 基金....), 儲分換飛行里數/現金卷等.
2. 自動增值八達通, 唔覺唔覺又儲多d分.
3. 未到還款期, 你d錢係自己處, 變相有"利息"收.
唔知其他人點樣處理擠完既牙膏呢? 擠完就緊係丟啦! 仲洗講既.
其實早前"大發現"既節目內有講過, 原來睇來擠完左既牙膏, 其實入面仲有好多牙膏嫁~~只要你將牙膏還原返至充滿空氣既狀態, 跟住拎住牙膏尾"fing"下, 咁痴係兩邊既牙膏就會"fing"左出來, 打開個蓋, 牙膏就會跌出來.
咁樣處理, 擠完既牙膏仲可以用多十次八次.
以上方法適用於所有"牙膏狀"既日用品.
唔講唔知, 原來有d朋友真係學似廣告咁, 每次擦牙都係擠一條, 鋪滿整個牙擦頭, 即係咁樣:
因為廣告係咁樣賣.牙膏公司真係開心死啦, 真係話咁快就用完一支.
其實正確既方法, 只需要擠一粒豆咁大粒就已經夠啦.
http://www.toothclub.gov.hk/chi/adu_01_03_02_04.html#start
唔知有幾多人係咁樣比廣告誤導左呢~~
我覺得"慳"既一個大大原則係"為需要而買".
例如: 你見到一條覺得幾好既"裙"突然大減價, 由$900減到$500. 咁緊係即刻想買. 覺得買左就慳左$400. 當你想比錢時, 個售貨員又介紹你買一件外套, 話好襯你條裙. 外套減得仲多, $1200 減到 $600. 嘩~~計下買曬2件, 慳左成千銀. 
於是好開心咁比錢, 離開時拎走左兩件貨, 放低左$1,100.
我咁計數:
1. 本想只係想買條裙$500, 結果洗左$1,100. 即係洗多左$600. 你話唔係啊, 我買多左年外套, 多件外套著, 但其實衣櫃入面已經有好多外套(唔需要再買). 加上好多時係依種情況下買既野, 拎左返屋企多數都好少著(我自己都試過係咁樣). 所以一定要保持清醒, 買一件就一件.
2. 另一方面, 應該諗下係唔係"需要"果條裙. 好多時覺得好, 只係價錢貴先唔買. 突然一減價就不加思索去買, 因為覺得"抵左". 如果你停一停, 比自己一兩日時間考慮一下, 或者返屋企打開衣櫃睇下, 可能已經無左買既衝動. 咁連果$500都慳返.
【明報專訊】糧食原材料輪住加價，食油業協會更私下代替各大超市事先張揚，春節期間的食油割價促銷優惠，會由以往九折縮減至九五折，春節後各款食油更會加價10至15％，協會主席高調建議市民應
「預早購買」作好準備，但消費者委員會 批評如此「預告」，或會製造恐慌性的搶購潮，影響市場穩定，呼籲市民應保持理智，不用搶油。
本報記者昨日到百佳 及惠康 超市觀察各款食油售價，900毫升3支裝的粟米油、花生油、芥花籽油，售價約60多至80多元，比對消委會 去年公布的2006年平均超市食油售價，平均貴了三至四成（見另稿）。
今日睇到依段新聞, 腦入面即閃出"百物騰貴"四個字. 08年經濟好但通漲高, 加左人工都追唔到"開門七件事"既加幅. 
一般人都會去超市買油, 街市果d雖然平d, 不過都唔係幾信得過. 其實近年7-11及OK都有支裝油賣, 當然唔係日日有得賣啦. 栗米油一般 $15到一支(900克), 芥花子油平小小, 一般 $12左~一支(900克), 牌子方面多數係"紅燈"或"駱駝嘜", 間中都有"獅球嘜", 貴$1-$2蚊支到, 不過都平過超市好多(除開起碼$20支), 加上有貨就2-3日就清曬, 保証一定"新鮮", 所以我好耐都無去幫襯超市 lu.
當然來貨貴左, 價錢一定會跟住加左, 不過只要有"差價"存在, 都總算有得"慳".
