慳。師奶慳家日誌: 8月 2009

2009年8月31日星期一

Pizza Hut 下午茶 coupon

唔知大家岩唔岩用~

原圖請按此

2009年8月30日星期日

慳錢生活．水電煤(二)

慳煤氣(燃料)既方法:

1. 煮野之前睇下煲/鑊底乾未. 未乾就抺乾佢. 無左水份, 加熱就會得快,

2. 火開到同個煲/ 鑊底一樣咁大個圈.

3. 滾湯/煮面要記得蓋上蓋, 熱力就唔會流失.

4. 要煎要煮既菜, 盡量利用一鍋數菜既方式煮. 例如整早餐, 同一時間煎蛋, 腸仔, 火腿咁樣. 或者整d一鍋數食既菜色.

5. 燜既食物盡量用真空煲煮, 煲湯/煲粥都係, 慳返好多煤氣.

6. 根莖類既蔬菜, 好似椰菜花/豆角/羅白/芥蘭等, 都可以先用水焯過再炒, 慳時間又慳火.

7. 夏天沖涼, 過完水可以關上水制, 捽完身再開返, 唔好水開流, 除左慳煤氣, 仲慳埋水.

8. 可以既話, 夏天沖凍水涼, 唔開熱水爐就最慳.

9. 如果係用儲水式熱水爐, 最好係一家人接住沖涼, 水就唔會凍左又要熱返.

2009年8月29日星期六

Super Sandwiches Coupon

岩用就print出來啦~

美心派月餅

有免費月餅派, 真係咁著數.

睇下近唔近你~

原圖

2009年8月28日星期五

椰林閣海南雞餐優惠

依間有好多分店, 我間中都會去幫襯既.

依張睇下你岩唔岩洗.

2009年8月25日星期二

傻雞家族

阿囝係圖書館見到依套書既其中五本, 開心到呱呱叫~~即刻抱曬返屋企. 套書原來佢學校圖書館都有, 佢已經睇過其中兩本.

全套書共有8本. 睇個封面就知道係好攪笑既啦~

結果係: 成晚一邊睇一邊大笑~

全套書

索書號:889 4074

依套書好新正, 六月先至上架咋.

2009年8月24日星期一

開學記之視藝堂用品袋

小學另一樣唔同幼稚園既就係, 畫畫既用品要自備. 囝囝果間小學要家長準備一盒油粉彩, 一張墊檯紙, 濕紙巾(有需要時用).

果盒油粉彩雖然有個盒裝住, 不過始終都係粉彩類既用品, 用幾用就好易斷(尤其係粗魯既男仔用), 如果就咁放入書包, 可以想像到如果有顏色粉跌出來, 會攪到書包幾邋遢

同時, 為免囝囝執書包時執漏其中任何一樣物品, 我係廚房拎個透明密實袋, 裝好三樣野. 就好似咁樣.

點解用密實袋? 因為貪佢夠輕又一目了然.(小一需要帶依樣果樣, 個書包真係幾重下), 別外屋企本身已經有, 唔需要再另外買.

檯墊係百貨公司既宣傳單張, 又係貪佢夠輕.

濕紙巾就用酒樓果d獨立包裝 (叫屋企人去飲茶既時候, 如果無用就幫手留起).

估唔到依款拉鏈形既密實袋都好強韌, 用左一年都竟然無爛到. 而果盒粉彩雖然用到個盒爛爛地, 入面既筆都無跌過出來.

開左學幾個月, 就聽到有朋友向我投訴d粉彩跌出來, 攪到書包好烏糟, 証明依個防禦措施係有需要既. 我當然即時介紹佢用依個方法, 咁就再無"投訴"啦~

2009年8月22日星期六

開學記之通告袋

好多人都話上左小一, 小朋友既書包攪攪下就亂七八糟, 除左書.習作, 學校仲有好多通告/工作紙/便條, 如果小朋友全部塞曬入書包, 就會攪到皺曬, 好似梅菜咁樣, 媽咪日日要係書包幫佢搵返依d野, 都好煩~佢地又成日會交漏野.

聽到人地咁樣講, 舊年我就預先自己準備左一個F4通告袋比囝囝用.

依個袋有兩格, 半透明既. 我事先教左囝囝, 老師派既所有工作紙/通告/便條等, 佢收左就全部放入後袋(通常都係A4). 返左屋企, 佢要做既工作紙同功課, 做完夾好放返入後袋, 等我檢查. 而我簽左通告之後, 就會放係前格, 有時學校要交費(書薄/校車/旅行費等), 開左支票等亦係放係前格.

咁樣大家都好清楚, 學校派既野我唔會睇漏左, 交返比學校既野, 囝囝亦一目了然, 早上交功課既時候, 成個袋拎出來就得, 唔會交漏功課.

由幼稚園升上小一, 對小朋友來講真係好大好大既變化, 學校既通告都幾多下, 功課既有好多唔同既形式, 學校要求佢地自己處理既事亦多左好多, 依個通告袋都幫到佢, 最終亦都係幫到媽咪, 因為如果成日都搵唔到野/交漏功課通告比老師寫手冊, 都幾煩/火下.

依種袋好多書局/家品店都可以搵到, 十幾蚊左右.

2009年8月21日星期五

像根的妙用

像根就個個人屋企都有, 除左用來紮野, 仲有咩用呢?

囝囝做功課成日都周身郁無時停, 支筆寫幾個字就放低, 唔係行左去攪第二樣野, 就係成日寫錯字要用擦胶, 支筆一放低, 好容易就轆落地下.

做一次功課, 果支筆都唔知要跌幾多次, 跌得幾跌又斷筆芯, 又要幫佢刨筆, 真係好煩啊~ 點樣先至可以令支筆無咁易跌呢?

比我諗到啦~就係支鉛筆後面加一條像根, 好似咁樣:

加左像根, 支筆同檯面多左磨擦點, 就唔會係檯面轆, 咁就無咁易跌啦.

同一個道理, 如果個樽蓋難開, 你加幾條像根係上面, 開既時候就無咁冼手, 易開好多嫁~~

你都試下啦~

2009年8月20日星期四

鴻福堂$20 換購藥製龜靈膏

憑券到鴻福堂分店,可以優惠價$20 換購藥製龜靈膏(原價$38)或靈芝龜靈膏(原價$48)1盅

岩用就print出來用啦~

2009年8月19日星期三

美心$10 coupon (31/10/2009)

美心都有coupon.

2009年8月18日星期二

聖安娜$10 coupon

就咁印出來就用得啦~~買西餅都一樣得嫁~

2009年8月17日星期一

苦瓜黃豆炆排骨($35)

依排d苦瓜又肥又大, 天氣咁熱, 至岩食依味餸~

材料: 苦瓜(雷公鑿)三個($12), 排骨 ($20), 潮州咸酸菜 1/4個($2), 黃豆一把($0.5), 蒜頭數粒 ($0.5)

做法:

1. 苦瓜洗淨去囊後用切大塊, 排骨用糖, 生抽, 生粉略醃, 咸酸菜洗淨切大塊. 黃豆洗淨, 用熱水浸半個鐘.

2. 所有材料分別落鑊炒一炒.

3. 將炒過既材料放入大煲, 加水(上湯)至七分滿, 煮滾後, 用中火煲半個鐘.

4. 唔好開蓋, 再焗多半個鐘至好食.

p.s. 唔需要落任何既調味料, 因為咸菜既味已經夠.

依味餸既係餸又係湯, 有肉又有菜, 一家人食一味餸已經夠啦, 慳功夫又慳柴火, 完全展現出潮州人既慳儉精神, 係潮州餸入面夠曬代表性.依個餸, 最好係煲一大煲慢慢食. 越大煲越入味越好食嫁~

味道方面, 你試過包話好味過係酒樓食果d($2x一小碗無離味道).

咁樣既配搭, 煮出來既苦瓜一d都唔苦, 苦瓜仲好"林"添, 阿囝細細個已經開始食, 真係老少咸宜.

點樣簡"雷公鑿"? 外表方面, 顏色越深綠越好, 瘤紋要深同肥大既, 拎上手要輕身, 即係入面既瓜囊少, 稱起上來輕d.

苦瓜有幾好~, 真係好有益嫁~

2009年8月13日星期四

和民 coupon

睇下岩唔岩洗~

2009年8月12日星期三

開學記之書包

仲有二十日暑假就結束啦~唸起舊年囝囝升小一, 依個時間我就開始要幫佢準備開學既用品, 周圍咁樣問人啊格價啊, 心情都幾緊張下嫁~希望買到最岩用既野嗎.

今年當然就唔洗再咁樣做啦~因為舊年買既野, 今年完全可以用得返嗎~

舊年我買左依個護脊書包. 價錢$200左右. 係朋友報料係某夜冷鋪買到既. 真係估唔到, 經過囝囝一年來既粗暴對待, 包括隨意咁樣掉落地, 各種方式既拉扯, 各方面都竟然無損無爛, 係有d烏糟姐, 洗乾淨之後, 依家仲好似新既一樣. 朋友個仔經學校買既Sxx 護脊書包就有爆線, 所以我覺值得推介.

依個書包既間格大細好適中, 放得曬小一需要既用品, 內格可以放到F4既快勞, F4通告袋, 書, 美勞用品. 出面2個細格, 上格可以放圖書証, 八達通card, 校車証等等, 下格可以放到木顏色一盒, 剪刀, 胶水, 左右兩邊細格就放雨遮, 水樽, 紙巾等等. 咩上身又好貼背脊, 就算咩住來跑都唔會左右兩邊fing.

產品詳細資料, 書包既資料係第13頁.

後記: 我打左去問代理, 原來佢地已經無再入依款書包. 去街既袋就有.