日式食品批發 之 慳．師奶價

過年前, 妹妹同埋朋友夾份訂日式食品, 我又搭單訂. 今次訂左:

1. 大崎蟹柳 $500克 $48, 新年奶奶屋企打邊爐時食.(不過新價單加左價, 要$58). 依隻蟹柳唔係好岩打邊爐, 一煮就散開, 比較岩做沙律. 味道就唔錯, 有鮮味.

另一間特惠價仲平d, $47.

日本製既

2 炭燒雞肉串燒 $78 50串. 放入微波爐"叮"番熱就食得. d汁係甜甜地, 小朋友好仲意食. 懶起上來/無送時用來加送都唔錯(岩曬好似我咁既懶媽)

最近知道另一間賣得仲平d, $68 50串, 非常抵食. 圍起$1.36一串. 之前工展會都有得賣, 不過當時係$10 2條.

3. 雞翼餃子, 又係急凍即食食品. $38 10隻. 雞翼饟餃子

唯一不足係上海出品.

又係"叮"返熱就食得. 味道都係甜甜地, 又無骨, 岩曬小朋友.

4. $12.5 10隻. 日本出. 當早餐食, 一人5隻都只係$6.25. 咁一個人獨食曬都唔貴既.

可以煎又可以炸. 我用煎既. 味道就有d煙銀, 因為有雞軟骨成份, 食落有d粒粒咁. 好得意.

點解無十隻. 因為一路煎一路有人偷食左羅.

5. $10 10隻. 仲抵d.

我又係用煎, 好香脆~~ 拎左相機轉頭返來, 已經比人食左一半啦~

餃子每樣訂左2盒, 我食得好少咋~~最衰新年, 雪櫃無位放. 唯有等下次再訂過啦~~

另外, 我再仔細研究比較過, 糧油類產品都好抵買, 如果有食開既話一定要訂. 好似:

1. 日本德用萬字豉油(日本制), 1.8L, $36. 吉吉島賣$58.

 

2. 萬字多用途豉油(日本制), 1L, $25. 吉吉島賣$38. 

3. 日清日本麻油 (日本) 150ml/瓶, $19.50, 平時超市/吉吉島賣$24.9. 香過本地牌子多多聲. 仲有隻1L裝, $85.50, 超抵~~

4. S&B 金裝咖哩磚 (日本) 240g/盒(各口味), $18. 吉吉島賣$25.x. 如果食開又可以訂埋.

5. 丸友木魚精 (日本), $53, 平過超市好多.

6.日本讚岐烏冬 (日本) 280克/包, $10, 吉吉島$15.x

 

上次講笑咁講, 話咁多blog友問, 間公司要比返個廣告費我. 點知其中一間好醒目咁樣摸左上來,  又真係有好野益我---就係比個超特惠"慳．師奶"價我 & 我既朋友.

咁blog友都算係朋友啦~~

我既朋友~~如果想要價單, 就用私人留言留email比我啦~~

p.s. 因為匯率既關係, 20/2/09之後, 有幾樣貨品加左價, 我收到新價單啦~