清仔廚房 (免費午餐?)

大家知唔知, 出前一丁有個"清仔廚房", 免費比7歲以上既小朋友參加.

上星期我地好彩比抽中, 有得去參加.

囝囝好興奮, 仲特登著返件紅色T-shirt去參加, 話係配合返人地~, 真係未出發先興奮~

場地好大啊, 成個商場既中心位佔據曬~我地既"廚房"係台既右手邊.

一去到公關姐姐派左一人一條頭巾, 一條圍裙, 著起當堂成個"小廚師"咁樣. 原來唔止煮面, 導師Denice 先講解"出前一丁"既製作過程及分銷方法, 仲時不時問下問題, 小朋友都好留心聽, 為左要舉手搶答.

跟住到郁手整面既時間, 大家都太興奮啦, 係咁逼埋張檯到, 攪到導師要三番四次叫大家退一步. 由於時間關係, d面已經"和"好左, 一人分一塊 + 一枝面棒~

跟手就將面團壓扁~大家都出力啦~

壓好面團就放入攪面機, 然後小朋友出力攪~真係要幾大力下嫁~

整完面, 跟住就埋檯學煮面. 張檯一早set好曬, 非常之整齊. 睇得出佢地好"細心".

跟住聽導師講解煮面既過程. 相片中兩位著西裝男士, 係日清既高層(我睇到佢地既名牌), 一共有四個. 佢地企足全場1個鐘, 陪我地煮面, 真係唔話得, 咁有禮, 值得一贊~

郁手啦~大家都急不及待~ 囝囝都算熟手, 因為佢唔係第一次下廚, 係屋企已經自己煮過面食.

水滾落面煮三分鐘, 仲有"計時器". 果然係好認真~又要一讚. 每樣都跟足步驟, 做一步, 就有工作人員收走唔需要既物品, 手腳快到你feel唔到.

煮好啦~仲要砌個人樣. 你地睇唔睇到啊~

囝囝話媽媽係長頭髮, 加兩對筷子落去就似d.~(係你不知不覺間, 張檯上面既煮食工具已經清走曬, 日本人做事既方式又要再讚). 

好味啊~自己煮既特別好味啦. 同媽媽一齊食仲好味.

上完堂仲有証書 + 一堆禮物. 包括頭巾 & 圍裙.

拎左証書, 除左同派証書既日本人握手, 我教囝囝都行埋去其他果三個日本人握手+ 講 thank you. 話曬人地咁有禮, 我地都要以禮回報~佢地既反應係有d錯愕, 跟住就好開心. 禮多人不怪嗎! 最緊要大家都開心.

"有齊"架生", 又有煮面証書, 阿囝你以後自己可以煮面食啦!". (我仲唔乘機偷懶!, 將個ball交比佢.)

"好啊~我煮埋比你食啊!" ==>阿媽最大既收獲係呢句!

******************************************************************************

返屋企途中,

囝囝: "媽媽啊~原來世上真係有免費午餐嫁"

媽: "你諗真d, 真係免費咩? 我地都有付出嫁~" 

囝囝: "唔.......咁又係, 我地出左時間!"

媽: "唔止, 我地仲要出交通費. 所以唔算係完全免費, 只可以算"交換"啦. 大家交換各自所需既野"

"我明白啦~"==>囝囝既收獲.