芝士蕃茄焗天使麵($8)

天氣轉冷之後, 人好似特別容易肚餓, 突然間好想食食焗飯/麵 . 想食就郁手啦~

材料: 意大利粉(天使麵)3/4包 ($9), 中型蕃茄 4個($6), 冰鮮免治豬肉 ($9), 洋蔥半個 ($1), 蕃茄磚2塊 ($4), 芝士片一塊($2), 意式香草少許

做法:

1. 蕃茄. 洋蔥切粒. 免治豬肉用生抽, 糖, 生粉略醃,

2. 用少許油慢火將洋蔥炒至軟身備用.

3. 燒油鑊大火炒熟免治豬肉, 加入蕃茄粒同炒到軟身. 再加入洋蔥後, 注大半碗水, 中火煮滾.

4. 加入2塊蕃茄磚, 轉慢火煮約20分鐘, 其間不停攪拌 (如果覺得水份少左, 可以添加少許滾水) 

5. 熄火後再入少許意式香草攪勻.

6. 煲滾一大鍋水, 加少許橄欖油, 鹽, 然後加入意粉, 按包裝指定時間煮少一分鐘; 用筲箕隔水備用. (因為要再焗, 意粉不宜煮得太熟, 否則焗完就會太淋)

7. 將醬汁倒在意粉上. 

8. 將芝士撕成細塊放係面. (如果有小朋友, 可以搵佢地幫手, 佢地好樂意做依個工序) 

9. 放入多士爐焗至芝士軟化即成.

 

依餐要 $31, 四個人分, 每個人$8都唔洗.

阿囝話: 好好味啊~食到好飽添~ 佢有份整(切番茄 & 撕芝士), 就覺得特別好食, 又食得特別快啦~

p.s. 番茄磚可以係吉之島十蚊店買到, $12一包(我通常就等特價一次過掃幾包)