日式食品批發

事由係: 同事報料有間上樓既公司, 賣刺生級北海道珍寶帶子, $340一盒平過係citysuper/sogo買($380). 有幾個同事就幫襯買左. 來到我八掛開來一睇,嘩~~真係好大粒啊~~對我依個日本刺生狂熱者係好大既引誘~~個心十五十六係咁~~好想買啊~~好想食啊~~好多年前有人請我食過一次, 滋味難忘. 不過計落都貴, 成$17-$21.5一粒, 我忍~~

過左幾日, 我突然靈光一閃, 係網上search 一下, 話咁易比我搵到幾間日式食品批發店, 價錢仲竟然比我越格越平, 再上網睇埋人地blog既食評(一致贊好), 終於決定落單~~

12月31日同屋企人開餐~~打邊爐, 過新年. 妹妹就好大手筆咁樣order左一盒佢至愛既"醬油三文魚子" (500g $280)比自己.

幫奶奶買左: 藍盒帶子 $168 (ss) $168 36-40粒,

一樣可以做刺身. 吉之島有得賣, 一樣樣, 特價都要$368. 真係食水好深.

入面個樣:

size有4.5cm.

自己order左: 北海道珍寶帶子(2L) 19粒 $210

citysuper/sogo賣$380(或者更貴)

打開入面:

有幾大粒(6.5cm)~~睇下就知.

另外仲有蟹子(500g) $45.

因為仔仔好仲意食, 去壽司店次次都食幾牒. 所以買一大盒, 可以比佢有排食. 平時吉之島賣$2x 先得果小小.

松葉蟹柳 $53 (30條), 同朋友兩份分. 打算用來整壽司飯.

解凍左既帶子:

用凍滾水沖一沖, 開雙飛, 滿滿既一牒 

唔生食, 可以打邊爐, 或者用小小牛油煎一煎. 鮮甜到不得了. 過時過節, 係屋企同家人好友一齊分享美食, 一樂也.

仲有好多其他日式刺身/熟食品, 都係你估唔到既價錢. 以後可以係屋企整壽司, 唔洗再出街食啦~~

P.S.: 唔check唔知道, 原來日本北海道既帶子係有咁既規格嫁~~又學到野. 下次一睇個盒, 就知道自己買既係咩級數, 同埋有幾多粒啦~~

想知邊間訂, 你地可以留"私人留言"比我覆你地.

Remark:估唔到咁多人想知~~間公司要比返個廣告費我(講笑). 過依2日好忙(學校考試). 一次過覆唔曬, 比d時間我.

 又諗下如果大家都一齊去訂貨, 間公司會唔會加價呢~~