慳錢生活．水電煤(一)

水電煤三寶, 我地一入屋就要用佢地. 我知唔少人電費水費煤氣費月月都過千~~長期咁樣, 一年落來條數都好溶~其實要慳, 一d都唔難. 方法仲係個個都可以做到.

先講點樣慳水:

1. 洗手

- 水龍頭唔好開盡, 只需要開一條鉛筆咁粗既就夠啦~

- 洗手液唔好用太多, 擠小小就夠啦, 將買返來既洗手液加水稀釋或者自制洗手泡泡, 過水就唔洗過咁耐啦~順手仲慳埋洗手液既錢添

- 捽洗手液既時候, 唔好由得水長流, 先關上水喉.

2. 沖涼

- 換一個低出水量既花灑頭(日本城有得賣), 每次沖涼都慳到水.

- 如果唔係用恆溫熱水爐, 由噠著熱水爐至水熱, 中間時間流出來既水, 用盆留起佢. 可以用來洗碗/洗面/淋花/洗衫/洗手/拖地.......

- 沖涼液一樣加水稀釋左先用, 市面賣果d一般都好杰下.

- 沖涼液亦唔好搽太多, 一蚊銀咁上下大就夠啦, 咁過水可以過快d.

- 沖涼時洗埋頭, 一次過做曬2件事.

- 天氣暖既日子, 過完水捽身既時候, 關上水喉, 唔要水長流.

- 盡量用花灑沖涼, 減少浸浴.

- 沖完涼既水, 可以留起部份用來拖地.