紫草乳木果潤唇膏(滋潤配方)

我覺得香港真係無左秋天咁, 北大人一到, 突然間就變左冬天咁, 一早一晚真係好涼啦~又乾到死, 濕度日日都係50以下, 唔怪之得飲極水喉嚨都係乾既, 嘴唇亦開始抗議 - 乾裂.

特別係小朋友, 一早起身返學, 6點幾就落樓, 等校車既時間雖然唔長, 但北風無情, 只係兩日個嘴仔乾到好似阿伯咁. 起白邊甩曬皮.

唯有的起心肝, 拿拿林去整返支特潤唇膏比佢用. 好彩材料屋企都有齊.

得左~~ 整比小朋友既係無味. 順手整比奶奶老爺一人一支, 檸檬 同西柚味大家都仲意. 人年紀大左, 皮膚功能衰退, 所以老人家同小朋友一樣都需要特別注意護理.

有咩材料呢?

紫草根泡浸油(初榨特級橄欖油), 甜杏仁油, 荷荷芭油, 乳木果, 可可脂, 白蜂蠟, 維他命E油

有咩作用呢?

紫草根泡浸油(初榨特級橄欖油), 浸左三個月, 具消炎. 抗敏. 止血. 鎮痛. 殺菌等功效, 有活血化瘀, 治療皮膚損傷, 預防唇瘡的作用.

甜杏仁油, 含維他命E、維他命F、維量元素-硒，具高抗氧化與滋潤的作用。

荷荷芭油, 源自沙漠植物荷荷芭果實, 是最接近人體皮膚的油脂, 含豐富蛋白質, 礦物質, 滲透性極強, 可軟化皮膚, 使其回復活力光澤, 另含天然抗曬系數, 相當於 SPF4.

可可脂, 從可可豆中提取的植物脂肪，具滋潤及柔軟肌膚的功效，可幫助癒合和軟化粗糙皮膚.

蜂蠟能增加皮膚的柔軟及彈性，親膚性佳，不會造成任何過敏或不適，又有抗氧化、抗菌、抗UV、消炎、防霉等特性。

維他命E油有防腐作用, 屬油溶性抗氧化劑, 可為皮膚抗氧化, 防止唇紋出現。

點解係粉紅色既?? 顏色係源自紫草根泡浸油~全天然既,

比起之前整既"清爽配方潤唇膏", 依支搽上嘴既感覺係輕柔潤澤, 視覺上仲加有另一種既享受. 叫囝囝帶係書包, 返到學校再搽, 佢話唔洗, 因為佢覺得一早搽左, 到中午都仲有係處.

呢個配方適合嘴唇成日乾到裂, 或者要一早食西北風既人用. 

捉住囝囝早晚搽左三日, 嘴唇既"白邊"無曬~唔知點解, d仔硬係唔仲意搽唇膏, 係要爆到裂, 覺得痛先至肯搽.

如果你有興趣, 一樣可以sent /留email比我.