又係轉季既時間, 今日無出街, 乘機執下d衫換季啦. 一家大細, 好容易就執左一堆爛衫. 爛毛巾. 爛床單. 爛背包. 爛鞋......等等. 搵個大環保袋裝好, 執埋依個星期既舊報紙爛紙, 共有2大袋. 兩仔爺用車仔拉去樓下既環保回收店賣, 共賣得$20.
阿仔就最開心
, 因為d錢歸佢. 二十蚊對佢來講唔少數目啦. 佢放曬入錢箱留起第二時用.
我地以前d舊野就咁丟入大廈既"環保回收箱"既, 就手嗎~後來因為阿仔成日扭計要扭蛋, 屋企附近既環保回收店越開越多, 有日收工路經, 見新開間店直頭掛左塊白板出來, 列曬d回收價, 舊報紙: $1/公斤, 舊衫$2/公斤, 我靈機一觸, 不如將d舊野直接拎去賣, d錢就歸阿仔, 一來身體力行等佢知道咩野係recycle (學校都成日教), 二來佢有自己既錢, 咁要扭蛋就用自己錢, 用完就無.
三來等佢知道錢得來不易, 一大堆紙都賣得果幾蚊.
兩年落來, 我三個目的都達到
. 阿仔會自動將d物料分類丟, 小小既紙碎包裝盒佢都會放入我地既回收紙箱, 兩年內佢都只係錢箱拎過5次錢出來買野, 每次佢叫我地買野, 我地唔想買, 就會叫佢自己比錢買, 佢會諗下先, 諗完好多時都決定唔買, 原因係買左野d錢就會無左.
意料之外既係儲埋左千幾蚊, 我幫佢開左個銀行戶口. 將佢d利是錢都入埋一齊, 咁每個月都有小小"利息"收, 順便教埋佢咩野係"利息". 不過依排幾乎無利息收
, 好在回收價都升左, 家下最新價係: 舊報紙: $2/公斤, 舊衫$3/公斤.
阿仔繼續努力啊~~
-----------------------------------------------------------------------------------------
p.s. 最近佢問我, 除左賣舊報紙, 佢仲有咩方法搵錢呢?
沒有留言:
張貼留言