孺子可教也

阿仔早餐最仲意食"格格脆", 依佢喜愛既次序係咁排:

食左幾年都唔厭. 我通常都等大減價時先大手(10盒咁)入貨. 不過真係好左地方. 之前成日都賣$9.9盒, 後來變左$12.9, 依個月變左$14.9-$16.8. 

早2日d存貨食曬, 要去超市入貨. 佢至愛既第(1)款仲係無貨. 第二款賣成$16.8. 好貴啊~~我計來計去, 好似第三款既250克裝平小小($19.90), 叫佢不如食第三款啦. 佢搵過曬貨架, 確定第(1)款真係無貨, 就接受我既建議. 不過仲未死心, 立到職員落緊貨, 臨走前都要再去睇一次. 結果發現職員只係整理貨架咋~~

不過到我發現左依盒只係賣$12.90: 

同第(3)款一樣樣, 分別只在於價錢相差$6. 幾乎有成1/3咁多. 我叫阿仔自己比較下, 佢同意真係一樣樣. 不過我指出除左價錢, 仲有個唔同之處就係:

"貴果盒有"玩具"送, 平果盒就無播"

我以為佢會再諗下, 點知佢即刻就答我: 咁我唔要玩具啦. 我知道其實我地付出既錢包含埋買玩具既錢. 你以前同我講過. 我買依盒平既就得啦".

我確係講過. 當時係老麥, 佢要買兒童餐(要玩具). 我同佢講唔買啦, 因為1. 佢已經有果個玩具. 2. 其實買兒童餐已經包含左買玩具既錢. 唔需要買重覆既野. 3. 同樣既錢買大人餐, 我可以同佢一齊share. 兒童餐既份量太細就唔夠.

估唔到佢記左仲識得用返.唔好以為佢地細唔識, 真係"孺子可教也".